فلئش‌موبFleşmob - حیکایه
فلئش‌موب
یازار: ژاله اسماعیل
کؤچورن: حسین واحدی
- 91!
واحید آچیق قاپی‌نین یانینداکی ماسا‌دان قیشقیردی. کافه‌دکی طلبه‌لر[اؤیرنجی‌لر] مختلف یئرلردن قروپ شکلینده آیاغا قالخیب ال چالماغا باشلادیلار. 91-جی آدام-طلبه چاشیب قالدی. اؤزونو ایتیریب ایچه‌ری گیرمک عوضینه گئری قاییتدی.
- بو، 100 فاییز بیرینجی کورسویدو.
- اؤزو ده "فیلفاک".
یولداش‌لاری جاببارین آتماجاسینا اوجا‌دان گولدولر. “یورفاک”این اوغلان‌لاری اوچون “فیلفاک”این اوغلان‌لاری همیشه گولوش اوبیئکتی[زادی] ایدی.
فیلولوگیا[دیل‌بیلیمی/علم زبان] فاکولته‌سینده اوخودوغو گومان ائدیلن 91-جی آرتیق 5-جی 91-جی ایدی. بو گون 91 نفر 91-جی گؤزلمه‌یه سؤز وئرمیشدی‌لر. هر 91-ینجی‌یه بیر بالاجا دؤنر، بیر آیران آلیردی‌لار. سونرا دا اونو آلقیشلایا-آلقیشلایا یولا سالیردی‌لار. بو گون تقاعد[بیلیم/بورس] گونو ایدی و هئچ نه‌یه چاتمایان بو تقاعدله بو جور مزه‌لنمک اونلارا خصوصی ذؤوق وئریردی.
طلبه کافه‌سی‌نین آدمینیستراتورو[یؤنتیجی‌سی/مدیری] نیاز دا اونلارین خطرینه[xətirinə] دیمیردی. هم ده تئز-تئز اولموردو بئله حادثه‌لر. بو گونه‌جن ده بیر پروبلئم چیخمامیشدی. آما بیر دفعه تاریخ فاکولته‌سی‌نین دئکانینی[رئیس‌ینی] چاشدیرمیشدی‌لار. کافه‌‌دن تئز-تئز “50!” ائشی‌دن دئکان طلبه‌لرین ایچه‌ریده لوتو اوینادیغینی ظن ائتمیشدی. غضبله ایچری گیریب هامی‌نین چای ایچدییینی گؤرسه ده، یئنه لوتودان شوبهه‌لی قالیب حرصینی اؤز فاکولته‌سی‌نین طلبه‌لرینه تؤکموشدو:
- پالتار یویورلار ائله بیل ظالمین بالا‌لاری، بوتون گون چای ایچیرلر!
خزان/حیکایه‌جیک
خزان
یازار: حسین واحدی
کیشی، ایشچی‌باشی‌نین سرت باخیشلارینین آلتیندا ازیلسه ده سوپورگه‌نی داها برک توتوب داها جدی‌لیک‌له یئری سوپورمه‌یه داوام ائتدی. یانینداکی سوبای امکداشی بیر الینده سوپورگه، اوبیری الینده ایسه سیقار، ایگید اینسانلاری جاندان یاخان آجی بیر گولوش ایله ایشچی‌باشی‌نا یاخینلاشیب نئچه دقیقه پیچیلداشاندان سونرا سوپورگه‌نی گؤتوروب امکداشیندان خئیلاق اوزقلاشیب یئری سوپورمه‌سه ده سوپورمک اداسینی چیخارتماغا باشلادی.
نه‌یسه کیشی‌نین ایچینی یاندیران آلوولو باخیشلارین آلتیندا بئلی ده بوکولوردو. قولونداکی ساعاتا باخیب ایشین سونا چاتماسینی بیلدی. بیر یئره ییغدیغی زیبیللری زیبیل قابلارینا بوشالدیب ساغوللاشماق اوچون ایشچی‌باشی‌نین یانینا گئتدی. بیر آز ایشچی باشی‌نا دیل آغیز ائتمه‌یه باشلادی، او دانیشاندان سونرا ایشچی باشی اللرینی جئبلریندن چیخاردیب دیک سسله دئدی:
- مدیر سندن راضی دئییل! دئییر ایشله‌ین آدام دئییل او... فیریلداق دی... همده بیلیرسن دا... پاییز گلیب آرادا ائله ده ایش یوخدو. دئییبلر گون موزدلو ایشچی لردن فقط بیر نفر قالسین...
ایشچی باشی‌نین بو سؤزلری قمه کیمی سؤکوب دارما-داغین ائتدی ایشچی‌نی. کیشی خزانین قورو سویوغوندا اؤز ایچینده سس‌سیزجه اونو گؤزله‌ین دئدی-قودولارین هاراییندا کار اولدو.
یوخو (حیکایه‌جیک) Yuxu
یوخو
یازار: حسین واحدی
هر یانی دومان بوروموشدو. حیکایه‌لرده اولان اؤلولر شهرینه اوخشاییردی شهر. کیشی یالقیزجا آدی به‌للی اولمایان بیر خیاوان‌دا دورموشدو. یئریندن ترپنه بیلمه‌ییردی. جینقیری بئله چیخماییردی. بیر آن دومان هر یاندان چکیلیب گئتدی. باخیب گؤره بیله‌جه‌یی هر یاندا آغاجلارین یئرینه اینسان آیاغی وار ایدی.
چوخ چکمه‌دی خیاوان باشیندا اللرینده قانا بویانمیش بالتالارلا گؤرونن آغاجلاری گؤردو. نه دئدیکلری و نه دیلده شعار وئریب اعتراض ائتدیکلری به‌للی دئییلدی. یاواش-یاواش اونا ساری گلیردیلر. ال-آیاغی قورموشدو. خیالیندا، ایندی اونو دا بالتا ایله چاپاجاقلار دئیه دوشوندو. گؤزو آرخ‌لاردان آخان قانلارا ساتاشدی. خیالاتیندا، بیر آن‌دا، یوزلرجه آغاجی چاپدیغینی گؤزدن کئچیردی، آنجاق خیالاتیندان آیریلماغا امکان وئرمه‌دی، اونا ساری آتیلان بالتالار.
خیاوانی، قوخوسونا دؤزمک اولمایان بیر قان قوخوسو آلتینا آلمیشدی.
ایکینجی مرتبه‌لی دلی
ایکینجی مرتبه‌لی دلی
یازار: سایمان آروز
کؤچورن: حسین واحدی
“اینسانین تاریخی دلیلییین تاریخی قدردیر” (فوکو)
عادت کیمی اولموشدو منه. بوش واخت‌لاریمدا تبریزین مرکزی دلی‌خاناسینا گزمه‌یه گئدردیم.
دلی‌خانانین سول طرفینده شهرین ان بؤیوک خسته‌خاناسی یئرلشیردی.
اورکده بوغولموش آرزولار Ürəkdə boğulmuş Arzular
اورکده بوغولموش آرزولار
یازان: حسین واحدی
آنا، اوشاغین قولوندان چكه-چكه، كوچه‌دن ائوه آپارماق ایسته‌ییردی، قیزجیغاز ایسه، آغلایا- آغلایا، "منه دوندویما آل، من دوندویما ایستیرم!" دئییردی. آنا قونشولارین یانیندا اوزو قیزارا-قیزارا اوشاغی ائوه آپاردی. چورویوب پاسلانمیش قاپینی ایشیلله‌ییب، حیطه گیردیلر.
اوشاغین آغلاماق سسی ائوی آلتینا آلمیشدی. اوشاق حیطده قالیب گؤز یاشلاری اونون تكجه یولداشی اولدو.
آنا، اوتاقدان، گئجه یاغیش یاغان زامان ایچه‌ری‌یه قویان قابلاری حیطه گتیریب تاوان‌دان دامان سولاری كردی‌یه بوشالتدی. قیزجیغاز، باشین حیطده اولان بؤیوك تاغارا دایاییب، درین یوخویا جومموشدو.
قاپی دؤیولدو، آنا قاپینی آچماغا گئتدی، قاپینی آچارکن ارینی گؤروب:
"آى كیشی نه اولدو؟" "یئنه قاییتدین؟" – حزین سسله دئدی.
کیشی باشینی آشاغی سالیب، اوزوجو سسله: «اوچ ساعاتدی، فحله مئیدانیندا بونا-اونا یالوارماقدان یورولدوم، ایش یوخویدو» -دئییب، یاواشجا ایچه‌ری گیردی.
خرید PDF كتاب "سئوگی یولچولاری"
پوست‌مودئرن آزادلیق (حیکایه)
پوست‌مودئرن آزادلیق
یازار: سایمان آروز
کؤچورن: حسین واحدی
یاغیش شیرهاشیرلا یاغیردی. تؤوله‌نین دامینا تؤکولن داملا‌لار ایچری سوزولوب باشیمیزا تؤکولمک اوچون بیر-بیریله دالاشیردی‌لار.
سول طرفیم‌دکی شوشه‌سیز پنجره‌دن باییری گؤره بیلیردیم. گؤزل ایدی.
آما بیزه یاغیش گؤزللیک دئمک دئییلدی. اوستوموزدکی و تؤوله‌دکی قیغ‌لارلا پئیین‌لری بیرلشدیریب دام‌دان دامان سولارلا گؤزوموزه سپیردی.
یاغیش یاغاندا تؤوله‌ده یاشادیغیمی بوتون ووجودوملا حس ائدیردیم.
سویوق اولوردو و آنام مجبور قالیردی منی و قارداش-باجی‌لاریمی بیر یئره ییغسین.
همیشه ایسته‌میشدیم یاغیش آلتیندا دایانیب دویونجا معععع ائلییم.
آنامین گؤزونه گیرمک اوچون یئمک اوستونده قیرغین اولاردی همیشه.
چوبان بیزی اوتارماغا آپارسایدی هئچ، آما بئلنچی گونلر چوبانی گؤزلمه‌یه مجبور قالیردیق.
یونجانی گتیرنده ده قیامت باشلایاردی. یازیق آنام گؤرردی الینده بیر ایش گلمیر قارغیش ائدردی:
- “اتینیزی شیشده گؤروم بالاااا! چوبانا یئم اولا‌سیز بالاااا!
من هئچ واخت بو جمله‌لرین معناسینی بیلمه‌میشدیم. شیشین نه اولدوغونو بیلمیردیم. هئچ آنام دا معناسینی بیلمیردی.
شهلانین ننه‌سی Şəhlanın nənəsi
شهلانین ننه‌سی
یازار: ژاله اسماعیل
کؤچورن: حسین واحدی
دیوارین کونجونده بیر مدت یوماغا دؤنن‌دن سونرا یادینا نه دوشدوسه، تئز قالخیب تئلئویزیونو آچدی. چای سوزدو. پنجره‌نین بوخاریندا آچیق پنجره شک‌لی چکیب، اورا‌دان اوزون-اوزادی قار اؤرتموش یولا باخدی. تئلئفون زنگ چالدی. سبینه ایدی.
- نئینیرسن؟
- اوشویورم.
- قازی آچ دا.
- تئلئویزیونو آچمیشام.
- دلیسن؟
- سن بیزیم شهلانین ننه‌سینی تانیییردین؟
- یوخ. او هارا‌دان یادینا دوشدو؟
- هئچ. منی آنجاق شهلانین ننه‌سی باشا دوشردی.
- او نییه؟
- شهلانین ننه‌سی یای واختی همیشه دئیرمیش، تئلئویزیونو سؤن‌دورون، بیشدیک ایستی‌دن.
سبینه اورک‌دن گولدو. صاباح ایشده دانیشماغا مؤوضوسو واردی.
قوجا كیشی ایله خاقان/ناغیل
::: ناغیل (داستان فولکلوریک آذربایجان با ترجمه فارسی)
قوجا
كیشی ایله خاقان
حاضیرلایان: حسین واحدی
قدیم زامانلار بیر اؤلكه‌نین خاقانی اؤزونه یئنی و عظمتلی
بیر سارای تیكدیریب، جارچی‌لارینا امر ائدر شهرلرده جار سالسینلار هر كیم بو سارای‌دان
ایراد تاپیرسا، ایسته‌دیگی قدر قیزیل وئره‌جه‌یم، ترسینه گلیب تاپا بیلمه‌سه باشین
بدندن آییراجایام.
گونلر كئچیر هئچ كیمدن خبر چیخمیر. بیر قوجاكیشی بو خبری
ائشیده‌رك اؤز-اؤزونله دئییر:
"من عؤمورومو ائتمیشم، گئدیم او سارایی گؤروم،
اولابیلر بیر ایرادلار تاپابیلم، دیبی، دیریلمك یوخسا اؤلمك‌دیر."
یولا دوشوب، باشكنده یئتیشیر. خاقانین سارایینا یئتیشیب،
دئییر، خاقانا خبر وئرین بیری تاپیلیب سنین سارایینا ایراد چیخارتسین. خبری خاقانا
یئتیریب، اونو ایچری آلیرلار. خاقانین یانینا چاتاندا، خاقان دئیه‌ر:
"آی كیشی بیلیدیگنی كیمی ایرادلارینی ثابت ائده بیلمه‌سن
یاشاییش‌دان آیریلمالیسان!"
كیشی ایسه جاواب وئریر:
"سیزین سارایین ایرادلاری چوخ بللی‌دیر، ایندی اونلارا
ایشاره ائدیب سیزه ثابت ائده‌جه‌یم."
خاقان اوندان ایرادلاری ایسته‌ییب، قوجاكیشی بئله جاواب
وئریر:
"بو سارایین بیرینجی ایرادی بودور؛ چوخ گؤزل، عظمتلی و
یئنی اولسادا سیزه وفا قیلمایاجاق‌دیر. ایكینجی ایراد ایسه اونون گلن یوز ایل
ایچینده دییشمه‌سیدیر، آغاجلاری یئكه‌‌‌له‌جك، سندن سونراكی خاقان‌لار یئنی
دووارلار تیكه‌جك و مختلف دییشیكلرله اوزبه‌اوز اولاجاق‌دیر."
خاقان بو سؤزلرین قاباغیندا هئچزاد دئیه بیلمه‌ییب، قوجایا
اؤزو ایله آپارا بیلدیگی قدر قیزیل وئریر.
ایستانبول شرق ماهنی‌سی
"ایکی قاره بیر شهر: ایستانبول"
ایستانبول شرق ماهنی‌سی
یازار: حسین واحدی
şəkil: Ömer Şahin
اولدوزلو گئجه‌لری ایله باش-باشا قالان ایستانبولون کوچه‌لری عشق ایله
بزه‌نیب. شکیللرله فیلم لرله تانیش اولموشام ایستانبول لا. اونلاردا گؤروموشم
ایستانبولون ائله اولدوغونو. بورالاردا چوخلارینا ایستانبول یاد اولسادا منه جان
اولوبدور.
عوثمانلی دؤوروندن قالان جامی‌لری (جامع‌لر)، اذانلاری، دار کوچه‌لری، گؤزل
کؤرپولری، دنیز قوشلاری، گمی‌لر، تکنه‌لر، میناره‌لر و... میلیونلارجا اینسان.
بونلار ایستانبولدان آیریلارمی؟
بیر گون ده قالا بیلمز ایستانبول!
دنیز قوشلارینین سسی ایله اویانان ایستانبول، نازلی گونشین تئللرینی داراماسینا باخیب گونو باشلاییر. خالقی ایسه اویانیب یئنی بیر گونله ایش باشلاییر. گمی‌لر گلیر-گئدیر، اویناییر. کؤرپولر ایسه بزنمیش الوان چیراقلاری ایله قاش-گؤز آتیر بالکن دا سس‌سیزجه دایانیب سئوگیلیسینین عسگرلیک دن دؤنمه‌یینی گؤزله‌ین قیزا. صاباح یئلی یاواشجا اسمه‌یه باشلاییب تکنه‌لری یولا سالیر. بالیقچی‌لار آللاه اومید یله دنیزدن روزا قازنمایا گئدیرلر.
